高薪厚職？都要睇下你係咩職位咁啦，好多銀行RM（Relationship Manager），好聽啲講句咪manager囉，講到尾其實咪又係sales，睇下係sell保險、基金定MPF啫。上頭set咗target，如果你跑唔到，睇下佢問唔問候你？所以，點解你哋成日收到銀行同事cold call，你以為佢哋食飽飯無嘢做咩？要跑數呀大佬！

可能你會話，點都好過啲保險佬同保險阿姐吖，銀行有薪金喎。Well，如果係好跑得嘅保險經紀，佢點會睇得起你份糧吖，佢哋實會冷笑一下：「喺銀行跑咁多，有屁用咩。」係呀，你都袋咗人哋份糧啦，啲客係信銀行而入嚟買嘢，你仲妄想同銀行拆佣？跑唔到就被人鬧到媽媽聲，跑得多咪有丁屎咁多獎金囉。如果條數拎出去保險公司，百萬圓桌都有得你坐啦！銀行仲有個policy，就係定期要RM轉分行，提防你同啲客太熟，驚死你轉工挖埋啲客仔走。

咁你可能話：「食得鹹魚抵得渴著，你有公司mortgage喎。」係呀，係人都知做銀行有公司mortgage，超低息，仲可以借足100%，即係首期都唔使俾！不過，你以為真係咁著數？

如果你打算用公司mortgage，咁就差不多等於賣身俾公司。你同上司關係比較好都仲好啲，如果很不幸地你同上司關係麻麻地，你就千祈唔好俾佢知你用咗公司mortgage，因為我真係見過有人買樓開心得滯，講晒俾全世界知，之後佢上司就……嘿嘿，搞到阿下屬嗰年啲bonus少到好似無咁。無嘅，你都用緊公司mortgage啦，即係唔可以隨便走啦，咁得啦，bonus都慳番！不過調轉講，對啲fresh grad出嚟入大銀行做嘅人嚟講，人工必定唔高，想大幅度加人工，真係靠轉工先得，咁就話知佢bonus多定少，反正做一陣就走。 

所謂有辣有唔辣，局外人睇，公司mortgage係銀行從業員嘅恩物，但其實亦都係我哋嘅金剛圈，日日返工都好似俾人揸住半邊……面珠登咁！用咗公司mortgage就最好乖乖地，如果唔係師父一唸緊箍咒架，你隻馬騮就頭痛到爆炸！

作者：史高治叔叔
　　　後生嗰陣，大學一畢業就入咗大銀行商業部做sales，跟一班有名有利嘅客人打交道，有時可以跟埋一齊飲飲食食，花天酒地、燈紅酒綠嘅生活，造就今日呢個身經百戰又識玩識食嘅叔叔。